事先聲明，呢個故事唔係我寫嘅，我只係轉載網上資料；乃真人真事也。
－ 為保安全，請勿獨自閱覽，以便出咗事有人叫救護車，多謝合作 －
－ 請注意，瞓教前忍忍手，起身後慢慢嘆，多謝合作 －
身為世界級鐵路嘅烏龜鐵路（簡稱：龜鐵），每日接載 N 咁多人次嘅乘客，少不免會發生呢啲事……而且龜仔都30歲，National Rail Service 更加係百年大壽，平時我哋返工返學要靠佢……離開咗人世，都一樣有感情，要坐吓火車咁……
我哋平日話人多就熱鬧……原來人離開之後，都鍾意一齊聚埋，可能有「人」陪吓，又真確的冇咁悶嘅。話說喺 East Rail Main Line 現代化工事之後冇幾耐，National Rail Services 故意揾咗喺夜晚最熱鬧嘅地方俾工會用。呢個地方呢，就係對住荷花池嗰度。話說有一日，尾班車走ed之後，站務見到個台都冇晒客，就好自然執嘢收工。點知呢，佢入緊月台長室嘅時候，好似見到仲有人，咁好啦，於是去問吓佢咩事。行咗幾步，呢個女站務見到個客喺 Trackside，唔係喺個台道，於是就即刻走上前，第二個師兄同佢講：「唔好去呀，嗰個唔係客嚟咖！」當然你見到個人唔知道點解喺出站支燈隔離，都會理咗佢安危先，大叫：「乘客，呢度好危險咖，你唔好……唔好……唔……」本來以為個客係附近居民，唔習慣電化之後唔可以隨便入綫路，點知，佢見到個客冇下半身，「企」喺道望住佢，面無血色。於是頭先叫佢嘅師兄趕上前同佢講：「我哋返去收工啦，唔好阻住人哋」，唔知呢個客係唔係當年火車車斷下半身依家返嚟揾返大家……證明呢啲並唔係所謂口耳相傳出嚟嘅故事，而係總有一位喺左近，只係是但邊個見到邊個咁解……
不過如果你覺得呢啲係十幾二十年前嘅嘢，就錯啦。
話說幾年前，荒島綫因應 West Rail Main Line 開業，於是加多咗個站喺中途。有一晚，工程主管照原定時間 + 原定嘅 EMU 同 TO 一齊試車。原本相安無事嘅，架車行行吓突然間 Target 變0，架車 dup 停。試車嘅時候呢啲嘢好正常。但係架車差唔多停低嘅時候，Radio 有人講嘢……但係開頭唔係好清楚……之後聽到話報跳軌……吓大哥你唔係呀，半晚三更跳軌！之後 TC 就話跳軌嘅地方喺架車附近，叫佢哋兩個睇睇……兩個人落車，因為夜晚荒島綫沿綫都係好黑，根本睇唔到乜嘢，只有 OCC 開返晒軌道燈先可以睇到個情況係點。軌道燈一開，佢哋發現企緊軟軟哋嘅唔係道碴，而係企緊喺兩個人上面，一個男、一個女！
咁無端端呢一男一女又邊嚟咖呢？原來之前有人見到佢哋喺天橋度好開心錫緊嘴仔，點知突然間挨吓挨吓兩個人跌左落 Track 道，咁可能因為嗰時興鐵鏈掛牛仔褲，或者係佢哋身上嘅鎖鍉之類，成為咗短路夾，令 Track Circuit 變咗 Occupied，將頭先行緊架車嘅 Target 變0。
因為事發地點好近車站，而警察或者食環署冇 TC 授權係唔可以落軌道做嘢。於是，唯有請兩位入 Cab 坐吓。返到車站之後，當值站長都諗住差唔多天光，就請兩位入去食飯房瞓一陣。事關龜仔嘅車站有兩間叫食飯房嘅房間，一間呢有雪櫃同洗手盤，一間只有枱櫈，兩間房之間係有塊玻璃互通。於是個個朝早返到嚟，見到都媽聲四起。照慣例呢，如果車站死人嘅話，車站最高負責人就會同全人類派利市，希望大家日後吉利啲。不過站長係教徒嘅，於是只係求佢哋兩個可以到達主嘅懷抱，希望佢哋有咩罪惡和過錯都好，可以原諒同接納佢哋，即使佢哋生前未有跟隨住主，但都希望主你好好照顧你的兒女，願佢哋死後可以安息……如是者，照手續俾食環署帶佢哋走。之但係，呢家嘢真係要信邪，一段時間之後有一晚，呢位站長再當值嘅時候，聽到半夜3台嘅 PEP 響！個站收咗咁耐，點會仲有客咖呢？當站長一應機，傳來嘅聲音話：是咁的，我好悶呀，我女朋友又唔理我……站長再落去台睇咩事嘅時候，竟然困埋 LIFT，要自己打手機叫消防。自此，呢位站長冇幾耐就冇做，而呢個站幾任最高負責人都係唔好脾氣嘅。冇辦法啦，佢兩個死又要枉死，仲要俾咁多職員唔禮貌咁對待，真係寧可以信其有呀……
又最近有一次，我坐車去到上環站，因為要去永安中心，就一定要慢慢行去車尾，經林士站月台去 E 出口。香港人坐車一唔係瞓覺就係打機，再唔係就聽歌大聲到同架車鬥大聲。於是要清客嘅時候就煩到……如是者，見到架車咁耐未走，實知道係等清客。喺個台道我聽到個 TO 話：「呢道係尾站，請所有乘客落車，多謝合作！呢道係尾站，請所有乘客落車！係，呢個係尾站呀，落車！落車！呢道係尾站，落車呀！」但係我喺出面見唔到有客，咁算啦……我諗住，以前成日都有做開清客，幫吓 TO 一次咁多啦，好過佢喺車頭叫極都無人理佢。入到車望兩望，真確的見唔到有客喺度，既然架車冇客，咁究竟佢叫緊邊個落車呢？
